16 июнь көндө Өфө Хакимиәте башлығы Өлфәт Мостафин Мәжит Ғафури исемендәге мәҙәниәт һәм ял үҙәк паркында асыҡ һауалағы автокинотеатр төҙөү буйынса кәңәшмә үткәрҙе.
Буласаҡ автокинотеатр майҙанында ҡала Хакимиәте башлығы урынбаҫары Алина Сөләймәнова, Өфө ҡалаһының Октябрь районы Хакимиәте башлығы Сергей Плотников, «ӨфөПарк» предприятиеһы директоры Евгений Дубник һәм структур бүлексәләр етәкселәре менән берлектә ҡатнашыусылар проектты тормошҡа ашырыу концепцияһы, майҙансыҡты тыш яҡтан матурлау, төҙөкләндереү, уның эш режимы һәм башҡа эш мәсьәләләре тураһында фекер алыштылар.
Иҫегеҙгә төшөрәбеҙ, яңы объект өсөн Мәжит Ғафури исемендәге мәҙәниәт һәм ял үҙәк паркы майҙансығы һайланған. Ул туранан-тура кеше торған йорттарҙан алыҫта урынлашҡан, ҡышын бында һырғалаҡ һалалар, ә йәй көнө картинг майҙансығы ойошторола. Шуны ла билдәләп үтәбеҙ, автокинотеатр эшләгән осорҙа, төшкө ваҡытта, картинг менән дә шөғөлләнергә мөмкин буласаҡ.
Автокинотеатр ҡунаҡтары өсөн уңайлы навигация һәм 54 машинаға парковка урындары әҙерләнәсәк. Бөгөнгө көндә майҙанда 60 автомобиль «веер» формаһында ҡуйылған, улар киносеанс ваҡытында ла шулай урынлашасаҡтар.
Килеүселәр һуңғы быуын светодиод экранында фильмдар күрәсәк, ә фильмдың тауышын автомобиль аудиосистемаһынан уҡ тыңларға мөмкин буласаҡ. Шулай уҡ бында проект буйынса аш-һыу, снек, эсемлектәр менән фуд корт ҡаралған.
Бөгөнгө көндә экранды урынлаштырыу өсөн майҙансыҡ әҙерләнгән, ә төҙөлөш-монтаж эштәрен ағымдағы йылдың июль башында тамамлау планлаштырыла.
