Район Хакимиәте башлығы урынбаҫары Йәлил Вилданов етәкселегендәге кәңәшмәлә комиссия ағзалары – район Хакимиәтенең структур бүлексә етәкселәре ҡатнашты.
Район Хакимиәте Комиссияһының яуаплы секретары Ғәлиә Ғиләжетдинова үҙенең сығышында милли мәҙәниәтте, телде һаҡлау буйынса төп бурыстары хаҡында һөйләне. Ул шулай уҡ Орджоникидзе районы предприятиеларында һәм ойошмаларындағы алтаҡталарҙа хаталарҙы тикшереү буйынса эш алып барыу кәрәклегенә иғтибарҙы йүнәлтте.
Законға ярашлы, алтаҡталарҙың текстары республиканың ике дәүләт телендә – башҡорт һәм рус телдәрендә яҙыла. Шулай уҡ ике телдәге алтаҡта текстарындағы үлсәмдәр, ерлек, хәрефтәр бер төрлө булырға тейеш, ә һүҙҙәрҙе юлдарҙа урынлаштырыу эстетик ҡағиҙәләргә һәм нормаларға тап килергә тейеш.
Милли мәҙәниәтте һәм телде һаҡлау өсөн мәғариф линияһы буйынса ҙур эш башҡарыла. Орджоникидзе районы Хакимиәтенең гуманитар мәсьәләләр һәм мәғариф буйынса идаралығы начальнигы Юлиә Мостафина Орджоникидзе районы милли мәктәптәрендә грант проекттарын тормошҡа ашырыу хаҡында һөйләне.
Мәҫәлән, 2022 йылда 48-се Башҡорт лицейы «Заман» медиафорумы проекты менән Башҡортостан Республикаһы Башлығы грантын яуланы. Бер йыл элек 65-се Татар гимназияһы «Музей-мәғариф комплексы нигеҙендә татар телен һаҡлау һәм үҫтереү һәм мәҙәни-ара аралашыу тәрбиәләү» проектын тәҡдим итте һәм еңеүсе булды. 1 миллион һумға мәктәп музей экспонаттарын, шул иҫәптән техник ҡорамалдарҙы һатып алды. Быйыл Орджоникидзе районының ике милли мәктәбе – 48-се Башҡорт лицейы һәм 65-се Татар гимназияһы ла Башҡортостан Башлығы Грантына ғариза бирҙе.
Дөйөм алғанда, Юлиә Мостафина билдәләүенсә, һуңғы 3 йылда дөйөм белем биреү учреждениелары араһында грант конкурстарына ҡыҙыҡһыныу арта. Мәҫәлән, 2021 йылда 3 дөйөм белем биреү учреждениеһы ғариза бирһә, 2023 йылда грантҡа дәғүә итеүселәр һаны 16-ға тиклем артҡан.
Киләһе йылда Өфөнөң 450 йыллыҡ юбилейын билдәләүгә комиссияның эшмәкәрлеге әүҙем бара.
Комиссия ағзалары билдәләүенсә, Орджоникидзе районында Башҡортостан Республикаһы халыҡтарының милли телдәрен, мәҙәниәттәрен һаҡлау, өйрәнеү һәм үҫтереү буйынса эш уңышлы тормошҡа ашырыла һәм артабан да дауам ителәсәк.
