Торлаҡ-коммуналь хеҙмәте үҙ эшен дауам итә

Урамдарҙағы һәм йорт ихаталарындағы таҙалыҡ һәм тәртип – бик күп кешеләрҙең көндәлек һәм тәүлек әйләнәһендәге хеҙмәте һөҙөмтәһе. Үткән тәүлек тә торлаҡ-коммуналь хужалыҡ хеҙмәткәрҙәре өсөн бик тығыҙ булды. Әлеге мәлдә эштәргә 45 берәмек махсус техника һәм 27 юл эшсеһе йәлеп ителгән. Улар юлдарҙы һәм тротуарҙарҙы таҙартыу менән мәшғүл. Һепереү-йыйыштырыу машиналары ла иртә менән Ленин районының үҙәк урамдарынан үтте. Урам һепереүселәр ҙә ихаталарҙы, баҡсаларҙы, парктарҙы һәм скверҙарҙы ҡойолған япраҡтан һәм сүп-сарҙан таҙарта. «Горзеленхоз» хеҙмәткәрҙәре иһә сәскә түтәлдәрен ҡышҡылыҡҡа әҙерләй һәм ҡыуаҡлыҡтарҙы ҡырҡа. Шулай уҡ юлдарҙы ремонтлау эштәре дауам итә – Ленин районының төҙөкләндереү буйынса хеҙмәте Аҡ Иҙел, Нехаев, Ленинградская һәм Ауыл кисеүлеге урамдарындағы соҡорҙарҙы һәм уйымдарҙы асфальт менән тигеҙләй. Сүп-сарҙарҙы һәм ботаҡтарҙы йыйыу һәм тейәү ҙә графикка ярашлы башҡарыла – ошо мәлгә уның 137 кубометры сығарып түгелгән.