Ҡалала йәмәғәт транспорты туҡталышы павильондарын урынлаштырыу эштәре әүҙем бара.
7 сентябрҙә Ленин урамында «Башҡортостан» ҡунаҡһарайы туҡталышында яңы «аҡыллы» павильон барлыҡҡа килде.
«Аҡыллы туҡталыштар» гаджеттарҙы зарядлау өсөн USB-порттар менән, Wi-Fi аша бушлай Интернет селтәренә инеү, йәмәғәт транспорты теҙмәһе менән электрон табло, ашығыс хеҙмәттәрҙе саҡырыу төймәһе, светодиод яҡтыртыу менән йыһазландырылған.
Өфө ҡала хакимиәте башлығы урынбаҫары - транспорт һәм элемтә идаралығы начальнигы Илдар Юланов әйтеүенсә, октябрҙең аҙағына тиклем Өфөлә яңы 106 туҡталыш павильондарын урынлаштырыу ҡаралған.
- «Аҡыллы туҡталыштар» берҙәм интеллектуаль системаға берләштерелеп, пассажирҙарҙың хеҙмәтләндереү сифатын күтәрергә ярҙам итәсәктәр, - тип билдәләп үтте Илдар Юланов.
Билдәләп үтергә кәрәк, вандализм осраҡтарын киҫәтеү маҡсаты менән павильондар видеокүҙәтеү системаһы менән йыһазландырылған.